సుజనమధురం

నూతన సంవత్సరాగమనం - e-పుస్తకం - తెలుగు బ్లాగర్ల రచనా సంకలనం

2010-12-30T13:30:00.000-08:00

యాధృచ్చికంగా ఒకనాడు మేమిద్దరం కలిసి బ్లాగ్ మొదలెట్టాలి అనుకున్నాక, పేరు దగ్గరి నుండి టెంప్లేట్ దాకా.. ఏం రాయాలి దగ్గరినుండి ఎలా రాయాలి దాకా.. చర్చించుకోవటం చాలా ఉత్సాహంగా ఉండేది. టెక్నికల్ విషయాలనుండి ఇమేజ్ సెలక్షన్, క్రియేషన్... ఇలా పనులన్నీటినీ మా సమయానుకూలతని బట్టి ఇద్దరమూ సమన్వయించుకుంటూ వస్తున్నాం. ఇక్కడ మేం రాసే ప్రతీ పోస్ట్ కూడా బ్లాగుల్లో రచనలకి సంబంధించినది అయ్యుండాలనే మా మొదటి సూత్రాన్ని ఎప్పటికప్పుడు గుర్తెరిగి దానికి అనుగుణంగానే ఈ బ్లాగులో పోస్టులు ఉండేలా చూసుకుంటున్నాం.

ఒకానొక రోజు మాటల సందర్భంలో అనుకోకుండా ఈ-బుక్ ప్రస్తావన మా మధ్య రావటం, అమలు పరచటం వెనువెంటనే జరిగిపోయాయి. ఈ మొత్తం పుస్తకం రూపకల్పనలో ఎక్కువ కష్టపడింది మాత్రం మధుర అనే చెప్పాలి. అందరి పోస్టులూ డాక్యుమెంట్ చేయడం, ఫార్మాటింగులూ గట్రా చూస్కోవడం.. అవన్నీ తనే చేసింది. నేను కాస్త బిజీగా ఉండటం వల్ల మరింత సమయం ఈ పుస్తకం కోసం కేటాయించలేకపోయినప్పటికీ పాపం విసుక్కోకుండా ఓపిగ్గా తనే అన్నీ నెట్టుకొచ్చింది.

ఈ పుస్తకం కోసం పోస్ట్ లను ఎన్నుకోడం, రాసిన వారి నుండి అనుమతులు తీసుకోడం, వాటన్నిటినీ కలిపి ఒక పుస్తకంగా కూర్చటం... మాటల్లో చెప్పడానికి మూడు ముక్కలుగా అయిపోయినా... ఇదంతా చేతల్లో చూపడానికి ఎంత శ్రమ, ఎంత సమయం, ఎంత ఓర్పు అవసరమో మాకు స్వీయానుభవంలోకి వచ్చింది. ఈ పుస్తకం కూర్చే క్రమంలో మాకు సహకరించిన, మమ్మల్ని ప్రోత్సహించిన బ్లాగ్మిత్రులందరికీ హృదయపూర్వక ధన్యవాదాలు తెలుపుకుంటున్నాం.

ప్రకటించిన తేదికి ఎటువంటి వాయిదాలు వెయ్యకుండా విజయవంతంగా ఈ పుస్తకాన్ని విడుదల చెయ్యాలని మా ఇద్దరి కోరిక. ఎట్టకేలకు మేము అనుకున్న విధంగా నూతన సంవత్సరం ఏతెంచే సమయానికి 'నూతన సంవత్సరాగమనం' అనే మన తెలుగు బ్లాగర్ల రచనా సంకలనాన్ని e-పుస్తకం రూపంలో మీ అందరి ముందుకి తీసుకొచ్చినందుకు మాకు సంతోషంగా ఉంది. మీరందరూ వీలు చేసుకుని ఈ పుస్తకాన్ని చూసి, చదివి మీ అభిప్రాయాలు తెలియజేస్తే మరింత సంతోషంగా ఉంటుంది. విలువైన మీ స్పందన కోసం ఎదురు చూస్తాం.

- సుజ్జీ

ఈ e-పుస్తకాన్ని ఎవరైనా ఉచితంగా ఇక్కడ నుండి లేదా ఇక్కడ నుండి డౌన్లోడ్ చేసుకోవచ్చు.
బ్లాగ్మిత్రులందరికీ నూతన సంవత్సర శుభాకాంక్షలతో..

ప్రకటన - మన తెలుగు బ్లాగర్ల రాతలతో e-బుక్ రూపకల్పన!

2010-11-16T05:20:00.000-08:00

మనందరం బ్లాగుల్లో ఎన్నెన్నో అనుభవాలు, అనుభూతుల గురించి రాసుకుంటాం. అప్పుడు ఆ సమయానికి అది కళ్ళబడిన వారు చదివి స్పందిస్తారు. మన రాతలని ఇష్టపడి మన బ్లాగుని అనుసరించేవారైతే మళ్లీ మళ్లీ చూసే అవకాశం ఉంది. కానీ, బ్లాగు మూసివేయబడటమో, లేక మరే ఇతర కారణాల వల్లనో మన రాతలు కొన్నాళ్ళకి మరుగున పడిపోక తప్పదు. అలా కాకుండా మన రాతల్ని పదిలపరిచి మరింతమంది కొత్త కొత్త పాఠకుల వద్దకి చేర్చగలిగే సౌకర్యం ఏదైనా ఉంటే బాగుంటుంది కదా!

ఇప్పుడు మాకొచ్చిన ఆలోచన ఏంటంటే, ప్రత్యేకంగా ఒక ఇతివృత్తాన్ని తీసుకుని, దానికి సంబంధించి వివిధ బ్లాగర్లు రాసిన వ్యాసాల్ని సేకరించి ఒక e-బుక్ గా తయారు చేస్తే బాగుంటుంది అని. ఆ రాతలు మనకు ఎదురైన అనుభవాలు, అనుభూతులు, మర్చిపోలేని సంతోషాలు, విషాదాలు, జ్ఞాపకాలు, సరదా సంఘటనలు.. ఇలా ఏవైనా అయ్యుండచ్చు. ఖచ్చితంగా నిజంగా జరిగినవే కాకపోయినా కథలో, కల్పితాలో, కవితలో కూడా అయ్యుండచ్చు. మనందరం రాసినవి ఏ రూపంలో ఉన్నా వాటన్నీటి ఇతివృత్తం మాత్రం ఒక్కటే అయ్యి ఉండాలి. అచ్చంగా అనేకమైన రంగురంగుల పువ్వులని చేర్చి ఒకటే దారంతో దండ గుచ్చిన మాదిరిగానన్నమాట! ;)

మన బ్లాగర్లందరూ ఎవరి శైలిలో వాళ్ళు రాస్తారు కాబట్టి, వీటన్నీటినీ ఒక చోట చేర్చితే తయారైన e-బుక్ మహా పసందుగా ఉంటుందని మాకనిపిస్తోంది. అంతే కాకుండా, అన్నీటినీ ఒక చోట కూర్చడం వల్ల చదివిన వాళ్ళకి కూడా ఒక మంచి అనుభూతిని మిగులుస్తుంది. ఉచితంగా దొరికే ఈ పుస్తకాన్ని ఎవరమైనా సరే శాశ్వతంగా మన సొంత సేకరణలో భద్రపరుచుకోవచ్చు. మా ఈ బ్లాగుతో పాటు ఉచిత e-పుస్తకాలని పొందుపరిచే ఇతర వెబ్సైటులని కూడా సంప్రదించి వీలైనన్ని ఎక్కువ చోట్ల మన e-బుక్స్ అందుబాటులో ఉండేలా మేము ప్రయత్నిస్తాం. ఇది కేవలం బ్లాగుల మీద ఆసక్తితో తలపెట్టిన పనే గానీ మాకు మరేవిధమైన లాభాపేక్ష లేదని మనవి చేస్తున్నాం. :)

మేము ఎంచుకున్న మొదటి ఇతివృత్తం - 'నూతన సంవత్సర ఆరంభం'

మా ఈ e-బుక్ ప్రయత్నంలో పాలుపంచుకోవాలనే వారికి సూచనలు:
- మీరు వ్రాసేది పూర్తిగా తెలుగులో, యూనికోడులో ఉండాలి.
- మీ రాతలు సొంత అనుభవమైనా, జ్ఞాపకమైనా, కవితైనా, ఊహలైనా, కల్పిత గాథైనా, కథైనా ఎలాంటి రూపంలోనైనా ఉండవచ్చు. కాకపోతే, అందులో ఇతివృత్తం మాత్రం 'నూతన సంవత్సరానికి' సంబంధించినది అయ్యి ఉండాలి.
- మీరు పంపే వ్యాసం ఈ పాటికే మీ బ్లాగులో ప్రచురించినదైనా గానీ, ఒక వేళ మాకు పంపించాక మీరు మీ బ్లాగులో ప్రచురించుకోడానికి కానీ ఎటువంటి అభ్యంతరం లేదు. ఇదివరకే వేరే ఏదైనా వెబ్సైటు కోసమో, పత్రిక కోసమో రాసినదైతే మాత్రం దాన్ని తిరిగి ఇలా e-బుక్ లో పొందుపరచే విషయమై అవసరమైన అనుమతులు పొందవలసిన బాధ్యత, తద్వారా ఎదురయే ఎలాంటి పరిస్థితులకైనా పూర్తి భాద్యత మీదే!
- మీరు రాతల పైన సర్వహక్కులూ మీవే!
- మీ వ్యాసంతో పాటు మీ వివరాలు, బ్లాగు URL , ఈమెయిల్, ఫోటో తదితర వివరాలను కూడా పంపిస్తే వ్యాసంతో పాటుగా e-బుక్ లో పొందుపరుస్తాం. దీనివల్ల ఆసక్తి ఉన్నవారు మిమ్మల్ని సంప్రదించే వీలు ఉంటుంది.
- ఈ పుస్తకాన్ని కూర్చే పని మేము తీసుకున్నాం కాబట్టి, వ్యాసాల్ని ఎంపిక చేసే పనిలో మాకు పూర్తి స్వేచ్ఛ ఉంటుందని భావిస్తున్నాం!
- మీ వ్యాసాలు మాకు పంపాల్సిన చిరునామా sujanamadhuram@gmail.com, మీ వ్యాసాలు మాకు అందాల్సిన ఆఖరు తేదీ డిసెంబరు 15, 2010.

మాకొచ్చిన ఈ ఆలోచనని ఆచరణలో పెట్టడానికి మీరందరూ సహకరిస్తారనీ, మా ఈ ప్రయత్నం విజయవంతమై ముందు ముందు మరిన్ని బ్లాగులకి సంబంధించిన e-బుక్స్ ని మనందరం కలిసి అందుబాటులోకి తీసుకురాగలగాలని ఆశిస్తూ..

ధన్యవాదాలతో,
సుజ్జీ & మధుర

స్నేహ మధురం

2010-08-01T04:28:00.000-07:00

స్నేహితులు దొరకటం అదృష్టమా? కష్టమా? విధి విపరీతమా?

ఇప్పటి వరకు తారసపడ్డ ప్రతి వ్యక్తీ ఏదో ఒక విధం గా నా బుర్రకు జ్ఞాన దీపాలు వెలిగించినవారే.

గంగి గోవు పాలు చందాన .. మనసు తెలిసిన స్నేహం ఒకటైనా చాలు అనుకున్నప్పుడు గుర్తుకొచ్చే వారిలో మధురవాణి ఉండేది ముందు వరసే !!

స్నేహం విలువలు అని ఉపన్యాసం దంచలేను కానీ, స్నేహితుల దినోత్సవం సందర్భంగా తనకు శుభాకాంక్షలు సుజనమధురం గా చెప్పాలనుకున్నాను.

మా గొప్ప పనిమంతురాలైన మధురవాణి ఇంకో ఇరవై రోజుల్లో పెళ్ళికూతురు కాబోతుంది కూడాను. కనుక.. తనకు వివాహ మహోత్సవ శుభాకాంక్షలు.!!

కొసమెరుపు: సొంతం గా నాలుగు మాటలు రాయటం ఎంత కష్టమో కదా!

అయినా ఈ నెల తో బ్లాగటం మొదలెట్టి రెండేళ్ళు నిండినందుకు నాకు కూడా చపట్లు !!

బ్లాగ్స్పందన - 'పిచ్చి' తల్లి ప్రేమ

2010-05-31T00:45:00.000-07:00

'అమ్మ' అంటే ఉపోద్ఘాతం, వివరణ ఏదీ అవసరం లేని పదం. అమ్మ ప్రేమ, అమ్మ మనసు, అమ్మ గురించిన కబుర్లలో తీయదనం ఎంతని చెప్పలేం. ప్రపంచంలోని అమ్మలందరూ పూజ్యులే ఎందుకంటే, యీ సృష్టిలో ఉన్న ప్రతీ జీవి వెనుక ఓ అమ్మ ఉంటుందిగా మరి! అమ్మ గురించిన కబుర్లు ఎంత చెప్పినా, ఎంత విన్నా తనివి తీరదు. అమ్మ మనసు గురించి తెలుసుకున్న ప్రతీసారి మనసు ఆర్ధ్రమౌతుంది.

తల్లికి బిడ్డ మీదా, బిడ్డకి తల్లి మీదా ప్రేమ ఉన్నప్పటికీ యీ రెండూ ఒకలాంటివి కాదేమో! తల్లికి బిడ్డ మీదుండే ప్రేమకి అంతే ఉండదు. తన బిడ్డే తనకి ప్రపంచం. కానీ బిడ్డకి మాత్రం తల్లితో పాటు ఇంకా చాలా ప్రపంచం ఉంటుంది ;-) మా అమ్మమ్మ అంటుందీ.. తల్లి గర్భంలో జీవి ఎప్పుడైతే రూపు దిద్దుకుంటుందో అప్పటి నుంచి బిడ్డంటే తల్లికి తనలో ఒక భాగంగా బంధం పెనవేసుకుపోతుందట. తనకంటే తన బిడ్డే ఎక్కువ అన్న భావం బలపడిపోతుందట. కానీ, బిడ్డ మాత్రం తను సంపూర్ణంగా జీవం పోసుకున్నాక తల్లి పేగు తెంచుకుని పుట్టినప్పుడే ఆ బంధాన్ని తెంచుకుంటుందట. అంటే, బిడ్డకి చాలా సులువుగా తల్లిని వదిలి వెళ్లిపోగలిగే తెగింపు ఉంటుందిట. తనకి నచ్చినట్టు ఉండటం కోసం తల్లిని నొప్పించగలదు కూడా! కానీ, తల్లి మాత్రం ఏనాటికీ అలా చేయలేదుట. తనకెంత బాధ కలిగినా బిడ్డ సంతోషంగా ఉంటే చాలుననుకుంటుందట. ఆ విధంగా ప్రపంచంలో ఉన్న తల్లులందరూ తమ పిల్లలపై పిచ్చిగా ప్రేమను పెంచుకుని జీవితాంతం తమ కంటికి రెప్పలా కాపాడుతారు.

'బ్లాగ్స్పందన' అంటూ ఇలా 'మాతృ ప్రేమ' గురించి నేనిదంతా ఎందుకు చెప్తున్నానంటే... 'నా రాతలు' అనే బ్లాగు రాస్తున్న స్ఫురిత గారు ఇటీవల 'పిచ్చితల్లి' అని ఓ పోస్టు రాశారు. తన బంగారు పాప ఇంట్లో లేకపోతే ఇల్లంతా, మనసంతా ఎంత వెలితిగా అనిపించిందో, ఎంత దిగులేసిందో చెప్పారు. ఇంట్లో ఉన్న ప్రతీ వస్తువూ, తను చేసే ప్రతీ పనీ, పాపనే ఎలా గుర్తుకు తెచ్చాయో స్ఫురిత గారు వివరించిన తీరు మనసుని హత్తుకుంటుంది.

తాత్కాలికమైన ఎడబాటైనా సరే పాప కళ్ళెదురుగా లేకపోతే ఎంత బెంగొచ్చేస్తుందో, మనసంతా తన చుట్టే ఎలా తిరుగుతూ ఉంటుందో, తన భావాల్ని ఎంతో హృద్యంగా చెప్పారు. పాప దూరంగా ఉంటే, తనెంత భద్రంగా ఉన్నాసరే, తల్లి మనసుకి మాత్రం ఎంత గాభరాగా అనిపిస్తుందో తెలియజెప్పారు. అంతే కాదు.. అమ్మ అయ్యాకే మన అమ్మ మన పట్ల చూపిన ప్రేమ బాగా అర్ధమౌతుందనీ, మన అమ్మ మన గురించి పడ్డ బాధంతా మనకి బాగా అనుభవంలోకి వస్తుందంటూ తన అనుభవాన్ని చాలా అందంగా రాసారు.

అందరి అమ్మల్లాగే కూతురిపై పిచ్చి ప్రేమని పెంచుకుని నేనూ మరో పిచ్చితల్లిని అయిపోయాయని స్ఫురిత గారు రాసిన వాక్యం మన కళ్ళనీ, మనసునీ కూడా తడిపేస్తుంది. ఓ అమ్మ మనసుని అద్దంలో చూపించిన ఆ టపా మొత్తం చదివేసరికి ఇదీ అని చెప్పలేని ఓ వింత అనుభూతి కలిగింది. అందుకే, యీ 'బ్లాగ్స్పందన' లో స్ఫురిత గారు రాసిన యీ పోస్టు గురించి ప్రస్తావిస్తున్నాం. ఎవరైనా మిస్సయ్యి ఉంటే, తప్పకుండా యీ పోస్టు చదివి మరోసారి స్వచ్చమైన అమ్మప్రేమని అనుభూతించండి.

-- సుజ్జీ & మధుర

'బ్లాగ్స్పందన'... అంటే.!?

2010-03-08T05:05:00.000-08:00

పుస్తకాలూ, పాటలూ, సినిమాలూ.... ఇవన్నీ ఒక్కొక్కరికీ ఒక్కో అనుభూతిని మిగులుస్తాయి. ఇది అందరికీ తెలిసిన సంగతే కదా! అయితే, నాకూ, సుజ్జీకి ఒక కొత్త ఆలోచన వచ్చింది. బ్లాగుల్లో పోస్టులు కూడా అంతే కదా! అని. అనుకుందే తడవుగా, యీ కొత్త ప్రయత్నానికి శ్రీకారం చుట్టేశాం :-) అదే 'బ్లాగ్స్పందన'. అంటే, ఫలానా బ్లాగులో ఫలానా పోస్టు చదివినప్పుడు నాకిలా అనిపించింది, నాకీ విధమైన అనుభూతి, ఆలోచనా కలిగింది అని మన 'సుజనమధురం' లో చెప్పడం అన్నమాట!

దీని వల్ల ఏంటీ లాభం అంటే... ఒకటి మాకు నచ్చిన పోస్టు మరికొంతమందికి పరిచయం అవుతుంది. ఇంతదాకా చూడనివాళ్ళకి చూసే అవకాశం కలుగుతుంది. ఇంకోటి, ఆ పోస్టుపైన వేరే విధమైన అభిప్రాయాలుంటే, ఒక మంచి చర్చ అవుతుంది. ఆ పోస్టు రాసిన సదరు బ్లాగరుకి కూడా తను రాసినదానికి చదువరులు ఎలా స్పందిస్తున్నారో తెలుస్తుంది. ఇది మాములుగా వ్యాఖ్యల రూపంలో కూడా తెలుస్తుందనుకోండి. కానీ, ఏదయినా మనల్ని చాలా చాలా ఆనందింపజేస్తే, లేదా ఆలోచింపజేస్తే దాని గురించి వివరంగా స్పందిస్తే బాగుంటుంది కదా! పైగా, 'సుజనమధురం' ఇప్పుడిప్పుడే బ్లాగ్లోకం చుట్టూ అల్లుకుంటున్న పూలతీగ లాంటిది కదా! (పోలిక బాగుందా ;-) అందుకే 'బ్లాగ్స్పందన' శీర్షికన అప్పుడప్పుడూ ఇలా స్పందించే కార్యక్రమం మొదలెట్టబోతున్నాం.

ఇందులో భాగంగా మొదటి పోస్టు నేనొక్కదాన్నే రాస్తా అన్నాను సుజ్జీతో.! సరే.. అంది సుజ్జీ విషయం తెలీక. మా ఇద్దరి మధ్యా ఇంత చక్కటి స్నేహబంధం ఏర్పడడంలో తన కవితల పాత్ర విస్మరించలేనిది. కాబట్టి, సుజ్జీ కవితలను గురించిన నా స్పందనే 'బ్లాగ్స్పందన' లో మొదటి టపా! అంటే, సుజ్జీకి చిన్న సర్ప్రైజ్ లాంటిదన్న మాట! ;-)

*******************************************

మనిషి మనసు ఎంత చిత్రమైంది కదా.! ఓ పట్టాన అర్ధం చేసుకోలేం.. అది మనదైనా..మరొకరిదైనా.! మనసులో ఉప్పొంగే భావాలు ఎన్నెన్నని చెప్పగలం.!? ఎన్నెన్ని ఉన్నా, ప్రతీ క్షణం కొత్తకొత్తగా మళ్ళీ బోలెడన్ని వచ్చి చేరుతూనే ఉంటాయి. ఎన్ని వచ్చి చేరినా ఎప్పటికీ నిండిపోదు.. పుష్పక విమానంలా! :-) ఆనందం, ఆశ్చర్యం, అద్భుతం, అలక, సందేహం, జ్ఞాపకం, నిరాశ, దుఃఖం, బాధ, వేదన.. ఇలా మదిలో జనించే భావాలెన్నో... ఎన్నెన్నో మన హృదయసాగర మథనంలో! ఒకొక్కప్పుడు మన మదిలోని భావసంక్లిష్టత ఎలా ఉంటుందంటే, ఎంత ప్రయత్నించినా ఆ భావాన్ని మాటల్లో పేర్చలేము. మన మదిలో గడ్డకట్టుకుని ఉన్న లోతైన భావాన్ని బోలెడన్ని వాక్యాల్లో నింపకుండా కేవలం చిన్న చిన్న పదాల అల్లికలో నింపి చెప్పగలమా? ఒకవేళ ఎవరైనా అలా చెప్పగలిగితే మాత్రం.. అది అలాంటి భావ వ్యక్తీకరణ చేయగల వ్యక్తి ప్రత్యేకతే అంటాను నేనయితే. అలాంటి ప్రత్యేకతే నాకు సుజ్జీ రాసే బుల్లి బుల్లి కవితల్లో కనిపించింది. గట్టిగా నాలుగు వాక్యాలు కూడా లేని చిట్టి పొట్టి రాతల్లో, సాదాసీదా పదాల్లో.. ఇంత చిక్కనైన భావం ఎలా నింపిందా.!? అని సుజ్జీ కవితలు చదివిన ప్రతీసారీ నేను ఆశ్చర్యపోతూనే ఉంటాను.

తన కవితలు మళ్ళీ మళ్ళీ చదివినప్పుడు కూడా మొదటిసారిలానే మళ్ళీ మళ్ళీ ఆశ్చర్యంలో మునిగితేలుతూనే ఉంటా.! నన్నింతలా అబ్బురపరుస్తున్న తన కవితాపుష్పాలకి నా మనఃస్పందనని కాసిన్ని మాటల్లో కూర్చి చెప్పే చిన్న ప్రయత్నం చేస్తున్నా.!

*********************************************

నీ కోసం ఏరుకొచ్చిన మల్లె లన్నీ
నీ ఊసులతో మాల అల్లాను!
రోజంతా ఎదురు చూసి చూసి....
పువ్వులన్నీ చిన్నబోయాయి..!
మనసంతా అల్లుకున్న నీ తలపులతో, నా
కనులు బరువెక్కి వాలిపొయాయి..!

'నీ కోసం' అనే యీ చిన్నికవితలో బోలెడంత విరహం ఒలికిపోతున్నట్టుగా అనిపిస్తోంది నాకు. నీకోసం ఏరుకొచ్చిన మల్లెల్ని నీ ఊసులతో మాల అల్లానని మురిపెంగా చెప్పడం ఎంత ప్రియమైన భావన కదూ!? ఇంతలోనే చిన్నపాటి ఆశాభంగం.. తన దర్శనభాగ్యం కలగలేదని. తానే కాదు తాను తెచ్చిన మల్లెలు కూడా ఎదురు చూసీ చూసీ చివరకు ప్రియసఖుడి మీద కినుక వహించి తమ మోము చిన్నబుచ్చుకున్నాయట.! అంతలోనే, మళ్ళీ విరహం.. మనస్సంతా అల్లుకున్న ప్రియుని తీయని తలపులతో, కనుపాపలు బరువెక్కి సోలిపోయాయట. ఎంతందంగా ఉంది కదూ!!

**********************************

మనకి ఏదైనా సంతోషం వస్తే అది వ్యక్తపరచడం, పంచుకోవడం చాలా తేలిక. అది మనకి మరింత ఉత్సాహాన్ని, ఆనందాన్ని కలిగిస్తుంది కూడానూ.! కానీ, మన మనసుకి ఏదయినా బాధ కలిగితే, దాన్ని వ్యక్తపరచడం చాలా కష్టం. ఎలా చెప్పినా, ఎంత చెప్పినా మనలో ఉన్న వేదనంతా మాటల్లో నింపగలిగామా అంటే సందేహమే.!! కానీ, సుజ్జీ చేతిలో మాత్రం యీ చిన్ని చిన్ని కవితలు కొండంత భావాన్ని తమలో ఇముడ్చుకుని ముచ్చటగా ముస్తాబౌతాయి. ఎలాగో మీరూ చూడండి ఓసారి! :-)

ఒకోసారి చుట్టూ చూస్తున్న ప్రపంచానికీ, మనకీ ఈ సంబంధమూ లేదేమోనన్నట్టు, అసలేం పట్టనట్టు, నిరాసక్తంగా, నిర్వేదంగా అనిపిస్తుంటుంది. చుట్టూ ఉన్న ప్రపంచంలో నాకు సంబంధించినదేదీ లేదనేంత ఒంటరితనంగా అనిపిస్తుంది. మది నిండా బాధ, వేదన, అయోమయం గూడు కట్టుకున్నట్టవుతుంది. మనసుకి నచ్చింది దూరమైతే కలిగే మనఃక్లేశం, అలాగే తన మనసు కోరుకుంటోంది ఎంతటి అసాధ్యమో, తను చేస్తోంది ఎంత విఫల ప్రయత్నమో చెప్పడానికి ఇంతకంటే సరైన మాటలు దొరుకుతాయా.?

నాది కాని లోకంలో

ఏ మనిషిని వెతకను..??

నీళ్ళు లేని సంద్రంలో

ఏ నావను నడపను..!!??

**************************************

ఎన్నెన్నో అందమైన ఊహలతో, కోటి ఆశలతో ఒక అందమైన భవిష్యత్తుని ఊహల్లో చిత్రించుకుంది ఓ మనసు. తన మదిలో అల్లుకున్న జీవన చిత్రానికి మరో అందమైన మనసు తోడై సరికొత్త వర్ణాలు అద్దుతుందని మురిసిపోయింది. ఇంతలోనే, అందుకు భిన్నంగా తనూహించిన అందమైన మనసు వికృతరూపం దాల్చి తన కలలన్నీ కల్లలు చేస్తూ, ఆశలన్నీ ఆవిరి చేస్తూ ఉన్నపళంగా తనని దుఖసాగరంలో ముంచేస్తే ఆ ఆశాభంగం ఎలా ఉంటుందో ఊహించండి. ఎంత వేదన కదూ!? అంతటి ఆశాభంగాన్ని కేవలం ఇంత చిన్న వాక్యాల్లోనే నింపేయగలగడం చూస్తోంటే అబ్బురమనిపిస్తోంది కదూ!!

యుగాలుగా ఒంటరిగా ఉన్న నేను
నిజాయితీగా నా హృదయం పరిచాను..!
నీ కళ్ళల్లో నన్ను చూసుకునే వేళ
నా కళ్ళల్లో కన్నీరై మిగిలావు... !!

సుజ్జీ కవితలు చదివాక, కేవలం అందమైన జ్ఞాపకాలు, ఊసులే కాదు, వేదన నింపిన పలుకులు కూడా ఇంతందంగా ఉంటాయా అని నాలాగా మీరు కూడా ఆశ్చర్యపోతున్నారు కదూ!!?

బ్లాగావరణంలో నవ్వుల పువ్వులు పూయిస్తున్న 'హాస్యాంజలి'

2010-02-04T03:31:00.000-08:00

సందర్భానుసారం అందమైన మాటలు వాడే వారిని మాటకారి అంటాం. మనం కొంచం మాట మార్చి 'హాస్యాంజలి' బ్లాగర్ రాంగోపాల్ గారిని మంచి "బొమ్మకారి" అనాలేమో.!

ప్రతి హాస్యపు చణుకుకి ఓ యానిమేషన్ మెరుపును అద్ది అందించటం రాంగోపాల్ గారి ప్రత్యేకత అనొచ్చు. తెలుగు బ్లాగావరణంలో మొట్టమొదటి , ఏకైక యానిమేషన్ కామెడీ బ్లాగ్ గా 'హాస్యాంజలి'ని అనటంలో సందేహం లేదు.

ఈ బ్లాగులో అడుగు పెట్టగానే ఇది ఒక చక్కని యానిమేషన్ బ్లాగని మనకి వెంటనే స్ఫురిస్తుంది. దానిక్కారణం హాస్యాంజలి టైటిల్ తోనే ఉయ్యాల ఊగుతూ కనిపించే ఒక బుజ్జాయి, ఒక బుజ్జి పిల్లి , మరో పక్కన పట్టు వదలని విక్రమార్కుడిలాగా మళ్ళీ మళ్ళీ పడిపోకుండా నుంచోడానికి ప్రయత్నించే యువకుడు (స్క్రోల్ బార్ యానిమేషన్).

నవ్వు బాధలను తరిమికొట్టే టానిక్. నవ్వడం అనేది మనిషికి మాత్రమే ఉన్న గొప్పవరం. అందరూ ఎప్పుడూ నవ్వుతూ ఆనందంగా ఉండాలి అనేదే తన ఆకాంక్ష అని.. అందుకోసం తను చేసే చిరు ప్రయత్నమే ఈ 'హాస్యాంజలి' బ్లాగ్ అంటారు రాంగోపాల్.

'హాస్యాంజలి' వయసులో మూణ్ణెళ్ళ పసిపాపే అయినా అప్పుడే దాదాపు ఎనభై పై చిలుకు హాస్యపు జల్లుల్ని తన ఖాతాలో వేసుకుంది. ఎక్కువ మంది దృష్టి లో కి రాకపోయినా, మూసధోరణిలో కాకుండా జోక్స్ ని కొత్తగా ఆవిష్కరించే వారి ప్రయత్నం నిజంగా అభినందనీయం. అందుకే హాస్యాంజలి తప్పకుండా చూడవలసిన బ్లాగే.

భార్యా భర్తలు, మొగుడు పెళ్ళాలు, పతీపత్ని, హజ్బెండు-వైఫు.. హీ హీ.. అన్నీ ఒకటే కదా అనుకుంటున్నారా..? ఒకటో కాదో ఆయా లింకుకెళ్ళి ఓసారి చూద్దురూ..! అవడానికి ఒకే అర్ధం అయినా ఈ టాపిక్ మీద ఎన్ని వందల వేల జోక్స్ పుడుతుంటాయో మనకి తెలిసిందేగా.! హాస్యాంజలి లో కూడా అలాంటి జోక్స్ చాలానే ఉన్నాయి.

చిన్నపిల్లల అమాయకత్వం చాలాసార్లు నవ్వుల పువ్వులు పూయిస్తుంది. మచ్చుకి ఇలాగన్నమాట 1,2,3,4. అలాగే, పేకాట హాస్యమైనా, అత్తగారి హాస్యమైనా దానికి సరిజోడైన యానిమేషన్ బొమ్మలు కలిపి నవ్వించేస్తుంటారు రాంగోపాల్ గారు.

కేవలం నవ్వించడమే కాకుండా ప్రత్యేక సందర్భాల్లో తనదైన శైలిలో శుభాకాంక్షలు చెప్తుంటారు మనందరికీ. కార్తీక పౌర్ణమి, క్రిస్మస్, బాలల దినోత్సవం, భోగి, సంక్రాంతి, గణతంత్ర దినోత్సవం.. పండుగేదయినా 'హాస్యాంజలి' లో శుభాకాంక్షలు మాత్రం యానిమేషన్ మెరుపులద్దుకుని మనల్ని మురిపించాల్సిందే.!

వారి అభిరుచికి తగినట్టు , వ్యక్తిత్వానికి అద్దం పట్టేట్టు , బ్లాగులను సృజించుకోవటం లో రాంగోపాల్ గారి ప్రయత్నానికి అభినందనలు తెలుపుతూ.. వారికి ఒక చిన్న కానుకగా ఈ లోగోని బహుకరిస్తున్నాం.!

P.S: ఈ బ్లాగు గురించి మేమిక్కడ చెప్పిన అభిప్రాయాలు మరే బ్లాగుతోనూ పోల్చి గానీ, లెక్కగట్టి గానీ చెప్పలేదనీ, కేవలం ఈ బ్లాగుని గురించిన మా అభిప్రాయాలను నిర్దిష్టంగా తెలియపరిచామని మనవి.

మళ్లీ మరో చక్కటి బ్లాగుతోనో, పోస్టుతోనో.. మరోసారి మీ ముందుకి వస్తాం.. అందాకా సెలవ్.!

-- సుజ్జీ & మధుర

ఆటవిడుపు

2010-01-22T00:55:00.001-08:00

బొమ్మలెలా ఉన్నాయ్.. నేనే (మధుర) ఆ ఫోటోలు తీసింది ;)

బొమ్మల మాటెలా ఉన్నా కవిత బాగుంది కదూ..! విచిత్రమేంటంటే, ఈ కవిత రాసింది నేను కాదు. సుజ్జి అంతకన్నా కాదు ;-)

ఎవరు రాసారో తెలీదు. సేకరించిన చిరుకవిత భావన ఎంతందంగా ఉందో కదూ..!

కాశీమజిలీలో గురుమామయ్య కథాకమామీషు

2009-08-25T03:20:00.000-07:00

సాధారణంగా ఎవరు బ్లాగ్ రాసినా.. దాని వెనుక తమ అభిప్రాయాలు, ఆలోచనలు నలుగురితో పంచుకోవాలనే ఉద్దేశ్యమే ఎక్కువగా ఉంటుంది. ఎవరు ఏ విషయం గురించి రాస్తున్నారనేది వారి వారి అభిరుచిని బట్టి మారవచ్చు. ఏదైనా ఒక విషయం పట్ల విస్త్రృతమైన అవగాహన, పరిజ్ఞానం ఉండి, దాన్నిసులభతరమైన రీతిలో మరో నలుగురికి చేరువగా చేసేందుకు బ్లాగును వేదికగా చేసుకోవడమనేది చాలా అరుదుగా జరిగే విషయం.

ఇప్పుడు మేము చెప్పబోయేది పైన చెప్పిన లక్షణాలన్నీటినీ పుణికి పుచ్చుకున్న ఒకానొక తెలుగు బ్లాగు గురించే.. అదే శ్రీ అరిపిరాల సత్యప్రసాద్ గారు రాస్తున్న 'హాస్య దర్బార్' బ్లాగ్!.ఎంతో క్లిష్టతరమైన మేనేజ్మెంట్ విషయాలను సరళమైన భాషలో విపులంగా వివరించటంలో, అవి కథల రూపంలో ఆసక్తికరంగా మలచటంలో రచయిత నేర్పు, సామర్ధ్యం మనల్ని అబ్బురపరుస్తుంది.

అంతేకాదు, ఇలాంటివి రాయడానికి పూనుకోవడం ఒక రకంగా కత్తి మీద సాము లాంటిదే కూడా.! ఎందుకంటే, బిజినెస్ పాఠాలైనా, మేనేజ్మెంట్ పాఠాలైనా టెక్స్ట్ పుస్తకాల్లో మాదిరి రాసేట్టయితే అందులో ప్రత్యేకతేముంటుంది.? చదువరులకు ఉల్లాసంగా కులాసా కబుర్లు చెప్పినంత సరదాగా మన తియ్యటి తెలుగులో మేనేజ్మెంట్ సూత్రాలు చెప్పడమే ఈ బ్లాగులో ఉన్న గొప్పదనం.

'కార్పొరేట్ కాశీ మజిలీ కథలు' అని సత్యప్రసాద్ గారు ఎంచుకున్న పేరు ఆయన కథలకి అతికినట్టుగా సరిపోతాయి. కాశీ మజిలీ కథలు చదువుతున్నంత హాయిగానూ అనిపిస్తుంది. గురు మామయ్య చెప్పే కార్పొరేట్ కాశీమజిలీ కథలు అల్లుడు వెంకటరత్నానికే కాదు.. చదివే ప్రతి ఒక్కరికి ఉపయోగమే. ఇందులోని ప్రతి రచన చక్కని తెలుగులో సులభ తరమైన శైలి లో సాగుతూ ఆపకుండా చదివిస్తాయి.

ఈ బ్లాగుని గురించి తెలియనివారికి ఇందులో ఏమున్నాయో చెప్పే ఒక చిన్న ప్రయత్నంగా..

ఏ ఉద్యోగం కావాలన్నా ఇంటర్వ్యూలకి హాజరవడం మొదటి ,కీలకమైన మెట్టు. దానికి సంబంధించి గురుమామయ్య చెప్పిన కిటుకులు ఇక్కడ చూడొచ్చు.

ఈ మధ్య కాలంలో మన ఆంధ్రదేశంలోనే కాక సాఫ్ట్వేర్ ప్రపంచంలో కూడా ఒక హాట్ టాపిక్ గా మారిన సత్యం ఉదంతం గురించి గురుమామయ్య మాటల్లో ఇక్కడ చూడచ్చు.

ప్రపంచంలో ఎటు వైపు చూసినా కనిపిస్తున్న రెసెషన్ జపం, అగ్రరాజ్యం అమెరికా దివాళాకోరుతనం గురించి ఇక్కడ చూడచ్చు.

స్టాక్ మార్కెట్లు, షేర్లు అని వినడమే గానీ, వాటి గురించి పెద్దగా ఏమీ తెలీదనుకుంటే.. గురుమామయ్య చెప్పిన ఈ క్లాసుకు అటెండ్ అవ్వాల్సిందే మరి.!

ఇలాంటివే మరెన్నో వాణిజ్యపరమైన అంశాలైన ఇన్సూరెన్స్, క్రెడిట్ కార్డులు, మ్యూచువల్ ఫండ్స్ లాంటి వివిధ విషయాల గురించి విపులంగా చర్చించారు సత్యప్రసాద్ గారు ఈ 'హాస్యదర్బార్' బ్లాగులో.

అదీ, ఇది అని కాకుండా ఈ హాస్యదర్బార్లో వచ్చే ప్రతీ టపా ఉపయోగకరమైనదే కాబట్టి, అన్నిటినీ ముచ్చటగా ఒకే చోట భద్రపరచుకుని చదువుకోవాలనుకుంటే, తెలుగురత్న వారి సహకారంతో హాస్యదర్బార్ ఈ-బుక్ డౌన్లోడ్ చేసుకునే సదుపాయం కూడా ఉంది. ప్రస్తుతానికి ఇందులో ఈ బ్లాగులోని కొన్ని వ్యాసాలు మాత్రమే ఉన్నాయి. మిగతావాటిని కూడా ఈ-బుక్ రూపంలో అందించే దిశగా సత్యప్రసాద్ గారు ప్రయత్నిస్తున్నారు.

తెలుగులో మేము చూసినంతవరకూ.. ఇది ఒక అత్యుత్తమైన బ్లాగని మా అభిప్రాయం.

ఏతా వాతా మేం చెప్పొచ్చేదేమిటంటే అధ్యక్షా..! హాస్యదర్బార్ అని చెప్పబడేటువంటి ఈ ముచ్చటైన తెలుగు బ్లాగు మన బ్లాగ్జనులకు అత్యంత ఉపయోగకరంగా ఉందని, తెలియనివారు కూడా ఈ చక్కటి బ్లాగు గురించి తెలుసుకోవాల్సిన ఆవశ్యకత ఉందని మేము తెలియజేస్తున్నమహో..! తమ విలువైన సమయాన్ని వెచ్చించి ఇంత చక్కటి బ్లాగుని వ్రాస్తున్నందులకు గానూ.. శ్రీ అరిపిరాల సత్యప్రసాద్ గారికి అనేకానేక ధన్యవాదములు, అభినందనలు తెలుపుకుంటూ.. ఒక చిన్న కానుకగా ఈ లోగో ని అందజేస్తున్నాము..!

-- సుజ్జీ & మధుర

అందరికీ నచ్చేలా.. కొంచెం కొత్తగా..!

2009-07-27T01:50:00.000-07:00

ప్రశ్న: ఏంటీ సుజనమధురం.?
సమాధానం: బ్లాగు క్యాప్షన్ చూడొచ్చుగా ;)

ప్రశ్న: ఎందుకు?
సమాధానం: ఇదో ఆలోచనల కలబోత.!

ప్రశ్న: ఎవరి ఆలోచనలు?
సమాధానం: మావే.. (సుజ్జీ, మధుర)

ప్రశ్న: పరీక్ష (మీక్కాదు) అన్నారు. మరి ఎవరికి?
సమాధానం: అవును.. పరీక్ష మీక్కాదు. మాకే.! ఇన్నాళ్ళు హాయిగా నాలుగు కవితలు రాసుకుంటూ (సుజ్జీ), ఏవో పాటలు పాడుకుంటూ (మధుర) మా మానాన మేం ఉండేవాళ్ళం. మరిప్పుడేమో ఏదో పొడిచేద్దాం అని ఇద్దరం కలిసి ఒక బ్లాగ్ మొదలెట్టాం కదా.! ఇప్పుడు దాన్ని విజయవంతంగా, బ్లాగు జనులకు నచ్చేలా, అటు పనికొచ్చే సమాచారాన్ని అందిస్తూ, ఇటు కాలక్షేపానికన్నట్టూ, అన్నివిధాలా మెప్పించేట్టు రాయడం అంత సులువైన పని కాదుగా.! అందుకే.. పరీక్ష మీక్కాదు..మాకే ;)

ప్రశ్న: సరే.. అయితే ఏం చేయబోతున్నారు.?
సమాధానం: మేము ఇక్కడ చెప్పబోయే కబుర్లన్నీ మన బ్లాగ్లోకం చుట్టూనే తిరుగుతాయి. మన తెలుగు బ్లాగుల గురించి అందరికీ తెలిసిన మరియు తెలియని వివిధ కోణాల్ని ఆవిష్కరించే ప్రయత్నం చేస్తాం. కాకపోతే, ఒక విషయం స్పష్టం చేస్తున్నాం. మేము ఇక్కడ ప్రకటించే అభిప్రాయాలు, ఆలోచనలు మాకు మాత్రమే పరిమితమైనవి. ఎప్పుడు ఏ బ్లాగు గురించి ఏం చెప్తామన్నదానికి ప్రత్యేక నిబంధనలంటూ ఏమీ లేవు. మా స్వేఛ్చానుసారం ప్రవర్తిస్తాము. అలాగే ఇక్కడ మేము చేయాలనుకునేది స్నేహపూర్వకమైన భావవ్యక్తీకరణ మాత్రమే.!

ప్రశ్న: అంటే ఏం చేస్తారు?
సమాధానం: అది తెలుసుకోవాలంటే.. వేచి చూడండి. వచ్చే టపా నుంచే మొదలు ;)

పరీక్ష ( మీకు కాదు !)

2009-07-11T11:40:00.001-07:00

హలో వరల్డ్ !